PANATACARA

A.     Teges lan Ancas

Panatacara, pranata adicara utawa pambyawara uga asring sinebut pembawa acara (bahasa Indonesia), Master of Ceremoni/MC (bahasa Inggris). Panatacara ateges wong kang gaweyane nata acara, mimpin acara, ngarahake acara, supaya acara kasebut lumampah kanthi lancar lan becik. Panatacara adate ditemoni ing acara kempalan/rapat, upacara, seminar, mantu, ulang taun, talkshow lan sapiturute.

 

B.      Struktur Teks Panatacara

1.    Salam  Pambuka

2.    Pakurmatan (salam hormat)

3.    Puji syukur

4.    Pitepangan marang audien

5.  Wosing tatacara

6.    Penutup (panuwun lan pangapura)

7.    Salam Penutup

 

C.       Sarat Panatacara:

1.    Percaya Diri (Kendel)

2.    Komunikatif

3.    Kreatif lan Ekspresif

4.    Penguasaan Bahasa

5.    Teknik Vokal (Artikulasi&Intonasi)

6.    Menguasai Acara

 

D.        Tuladha Teks Panatacara:

1.    Salam pambuka
Tuladha:

Assalamualaikum warahmatullahi wabarakatuh, sugeng enjing, sugeng sonten, lan sapiturute.

2.    Pakurmatan (Salam hormat).
Salam pakurmatan marang wong kang rawuh ing acara kasebut.
Tuladha:

Ingkang dhahat kinurmatan Bapa RT…. (rapat RT), ingkang kula tresnani kanca-kanca siswa …… (rapat OSIS), lan sapiturute.

3.    Pambuka (Puji Syukur)
Nyucapake puji syukur marang Gusti Allah
Tuladha:

Puji syukur kita aturaken dhumateng Gusti Allah, amargi kanthi rahmat saha berkahipun kita sedaya saged makempal wonten ing papan menika.

4.    Isi
Ing perangan iki, pranatacara ngaturake/njlentrehake runtutane acara nganti rampung.
Tuladha:

Para rawuh ingkang kula tresnani, wonten ing mriki kula badhe ngaturaken urut rentengipun adicara ing dalu menika. Menggah adicara ingkang badhe kita lampahi inggih menika. Tuladha rapat RT:

a.    Pambuka

b.    Tanggap wacana saking ketua RT

c.    Laporan bidang kerja/ seksi-seksi

d.    Pirembugan/diskusi

e.    Pamaosing notulen 

f.   Panutup

 

Kanggo nyambung urutaning adicara, ing sela-selaning adicara pranatacara bisa ngaturake. 

Tuladha:

-       Para rawuh ingkang kinurmatan adicara ingkang salajengipun tanggap wacana saking bapa Ketua RT…(rapat RT)

-       Para kanca ingkang kula tresnani adicara lajengipun ….(rapat OSIS)

-       Para rawuh ingkang kula hormati, salajengipun inggih menika pembacaan ayat suci Al-Qur'an ingkang dipunbektakaken dening Ibu Siti Fatimah (adicara pengaosan)

-       Para rawuh ingkang bagya mulya, adicara dipunlajengaken kaliyan acara sungkeman (adicara ing mantu/mantenan)

-       Lan sapiturute.

 

5.    Panutup
Ing perangan iki, pranatacara bisa ngucapake matur nuwun marang para rawuh, lan nyuwun pangapura marang para rawuh menawa ana atur kang ora mranani. Ing perangan iki pranatacara uga bisa nutup kanthi atur hamdalah.
Tuladha:

Para rawuh ingkang bagyamulya, adicara pepangihan RT ing dalu menika sampun kalampahan kanthi sae. Mugi-mugi punapa ingkang sampun dados asil ing ndalu punika saged mbeta kesaenan warga RT 09. Kula minangka pranatacara ngaturaken matur nuwun awit rawuh penjenengan, lan nyuwun pangapunten menawi wonten atur kula ingkang mboten mranani penggalih penjenengan. Sumangga adicara ing wekdal punika dipuntutup kanthi waosan Alhamdulillah.

6.    Salam penutup

Tuladha:

Wassalamualaikum warahmatullahi wabarakatuh. Matur nuwun.

 

 

D.       Praktik Panatacara

 

PANATACARA RAPAT KARANGTARUNA

 

1.    Assalamualaikum warahmatullahi wabarakatuh

2.   Ingkang kinurmatan ketua karang taruna Karya Bakti dusun Gondanglegi.

Ingkang kula hormati pengurus karang taruna Karya Bakti dusun Gondanglegi.

Ugi ingkang kula tresnani kanca-kanca karang taruna Karya Bakti dusun Gondanglegi.

3.  Puji syukur kita aturaken dhumateng Gusti Allah, awit rahmat saha berkahipun kita sedaya saged makempal wonten ing papan menika saprelu nglampahi kempalan/rapat karang taruna rutin saben wulan.

4. Para rawuh ingkang kula tresnani, wonten ing mriki kula badhe ngaturaken urut rentengipun adicara ing dalu menika. Menggah adicara ingkang badhe kita lampahi inggih menika:

a.    Pambuka

b. Tanggap wacana saking ketua karangtaruna

c.    Laporan bidang kerja/seksi-seksi

d.    Pirembugan/diskusi

e.    Pamaosing asil diskusi dening notulis

f.     Panutup

 

Para rawuh sumangga kita bikak adicara menika kanthi waosan basmalah sesarengan, bismilahirohmannirrohim….

Para rawuh ingkang kinurmatan adicara salejengipun tanggap wacana saking ketua karangtaruna, dhumateng Mas Aditya kula sumanggakaken…..

Para rawuh ingkang bagyamulya, adicara salejengipun Laporan bidang kerja karangtaruna, dhumateng bidang sosial, bidang humas, sekretaris, bendahara kula sumanggakaken….

Para rawuh ingkang kinurmatan adicara salejengipun Pirembugan/diskusi ingkang dipangarsani dening moderator, dhumateng Mas Wahyudi kula sumanggakaken…..

Para rawuh adicara salajengipun pamaosing asil pirembugan, dening notulis…..

5.  Para rawuh ingkang bagyamulya, adicara pepangihan karangtaruna ing dalu menika sampun kalampahan kanthi sae. Mugi-mugi punapa ingkang sampun dados asil ing pepanggihan dalu punika saged mbeta kesaenan pramuda ing dusun Gondanglegi. Minangka pranatacara Kula ngaturaken matur nuwun awit rawuh penjenengan sedaya. Matur ugi dhumateng Sedaya ingkang sampun mratitisake ubarampe ing adicara dalu punika. Ingkang pungkasan kula minangka pranatacara, nyuwun agunging pangapunten menawi wonten atur kula ingkang mboten mranani penggalih penjenengan. Kupat duduhe santen, menawi lepat nyuwun pangapunten. 

6.    Wassalamualaikum warahmatullahi wabarakatuh. Matur nuwun.