Lampah Pandameling E - KTP
Sleman, www.jogjatv.tv- Sinaosa pandameling Kartu Tanda Penduduk
Elektronik utawi E-KTP taksih dados pirembagan, nanging ing Kabupaten
Sleman pandameling E-KTP kanthi sesarengan sampun kawiwitan dinten Rebo
enjing(5/10). Dinten kapisan pandaleming E-KTP ing Kecamatan Berbah, sampun
katingal regeng dening warga masyarakat wajib KTP, inggih saking para perangkat
desa lan kulawarganipun.
Kadosta ing
wewengkon Kecamatan Berbah, pandameling KTP Elektronik kanthi sesarengan dipun
adani ing kantor kecamatan kasebat. Ing tataran kapisan pandameling E-KTP
kangge para perangkat desa lan kulawarganipun. Salebeting ruwangan mirunggan
kanthi piranti ingkang moderen,para wajib KTP foto lan rekam identitas lumantar
netra lan sidik jari. Para warga ugi kedah tapak asta ingkang sedayanipun dipun
garap mawi komputer.
Sinaosa
sinebat massal, lampah pandameling E-KTP ing Berbah Sleman punika taksih
winates kangge perangkat desa ngantos pengurus RT lan kulawarganipun. Wondene
kangge warga masyarakat sanesipun dipun lampahaken ing pungkasaning wulan
Oktober. Saking 4 desa ing Kecamatan Berbah, ngantos pungkasaning taun 2011
punika, pandameling E-KTP dipun angkah saged ngladosi 13.000 wajib KTP saking
37.879 wajib KTP. Wondene sisanipun badhe dipun rampungaken ing taun 2012
benjing.
Dening: Hari Atmaja.
Tidak ada komentar:
Posting Komentar